Chi che sion
N grop de persones, na lingia de idees, sacotanta bona voa che à desmostrà tel temp che la Familia Coprativa Val de Fascia la é viva e gaerta.
L “Fassa Coop” descheche duc ge disc ades con simpatìa vel dir proveder, se troèr e de gra a la desvaliva boteighes loghèdes te la Val de sot (zenter comerzièl de Sèn Jan, la cinch boteighes sot cèsa e l’Eurospin) l’é doventà n pont de referiment, na prejenza segura per duta la comunanza de Fascia e per i ghesć.
Dantdaldut se dajon jù per ve secodir col ve sporjer n bon livel de servijes e per cerder i prodoc miores, col conscidrèr n muie l raport calità/priesc, ma ence col meter en esser politiches comerzièles che tegne cont de vesc besegnes.
Curiosità: da la pitola al sìmbol Fassa Coop
Studià, pissà, volù, acioche l raprejente l zenter de n teritorie, Fascia: chesta l’era idea da olache é pontà demez Alfredo Weiss e Franco Soraperra che di egn ‘70 i à pissà l simbol de la Familia Coprativa de Fascia.
Originèl, scempie, ma ence n pont de referiment te la cernudes che revèrda duta l’atività de la coprativa. Ma no l’é demò chest: l simbol l raprejenta na pitola stilisèda.
La pitola l’é l simbol de fortuna, de legreza e ence l color no l’é stat cerdù fora a cajo. Aldò di psicologhes, defat l color vert l vel dir aer forza, tegnir dur, aer balanzament e stabilità.
L simbol cernù donca no l’à de gregn valores: sibie l segnificat del color che chel de la forma l’é n bon augure per la firma, ma l palesa ence la responsabilità che duc chi che laora laìte i vel se tor sù per l ben de la Familia Coprativa de Fascia.
Lurèr zenza se desmentièr che la scomenzadiva de Don Antonio Leonardi, decan de Fascia, don Giacomo Giacomelli, Don Michele Soraruf, i prumes promotores de la Familia Coprativa, l’aea desche fondament i prinzipies de solidarietà e de fradaa e sie fin prinzipal l’era chel de lurèr adum e colaborèr a na vida da didèr e stravardèr i sozi sia te chel che i compra sia te chel che i ven.
Jir inant te l’atività con gaissa e legreza, cerder con ferstont, portèr inant con dezijion chi valores che i à fat a na vida che del 1896 vegne metù sù la coprativa, l’é duc i ideèi sconec te la pitola verda, simbol del Fassa Coop.